Kiffartuussineq, teknologi allanullu ikiuunneq soqutigisaraagit?
Attaveqariaatsit ilisimaviuk, suliavit ataqatigiissarnissai pikkoriffigaajuk – aammalu ulluinnarni allanngueqataaneq nuannaralugu?
Taava immaqa ILLIT Namminersorlutik Oqartussani qitiusumik allattoqarfimmi supportimi sulisuni pisariaqartippatsigit.

Atorfik sumut attuumassuteqarpa?
Sulisut F2-lerisut suleqatigissavatit, systemi pingaarutilerujussuuvoq sulisullu 1.000-it missaanniittut ullut tamaasa suliaminnut nalunaarsuinerminnut uppernarsaasersuinerminnullu atugaralugu. Ajoquteqanngittuaannartussaavorlu – taamaammat illit pisariaqartippatsigit!

Ilaatigut suliarisassavatit:

• Sulisut F2 pillugu apeqqutissaqaraangata unammilligassaqaraangatalu ikiuunneq (support ajoqutaasinnaasunillu suussusersineq)
• F2 qanoq pitsaanerpaamik atorneqarsinnaaneranut ilitsersuineq
• Pilersuisorisagut atuisullu peqatigalugit aaqqitassaaqqanik suliaqarneq

Suna naatsorsuutigisinnaaviuk?
Atorfik soqutiginarluinnartoq suliffeqarfimmi nutaajusumi ineriartortumilu neqeroorutigisinnaavarput, tassanilu suliassat aqqutigalugit illit ineriartoqataasinnaallutit. Ulapaarfiuvoq – isumassarsianiillu iliuuseqartoqapallattarluni!

Kinaavit?
Tulliuttut ilinnut attuumassuteqarpata immaqa illit ujartugaraatsigit:

• Qarasaasiaqarnermi ilisimasaqarneq naleqquttumilluunniit ilinniarsimaneq
• Assingusunik suliaqarnermut misilittagaqarneq
• Kiffartuusserusussuseqarneq aammalu inunnik assigiinngitsunik oqaloqateqarsinnaaneq
• Ataqatigiissumik isiginnittaaseqarneq – aamma ulapaarfinni
• Pinerlussimannginnermut uppernarsaateqarneq

Sooq uagut toqqassavitigut?

• Peqataatinneqarlutillu akisussaatinneqassaatit – isumassarsiatit tusarnaassavagut
• Suleqatigiinneq eqaatsoq, ikioqatigiiffiusoq tunniusimaffiusorlu suliffigaarput
• Piginnaasatit aallaavigalugit sukumiisumik ilinniartinneqarlutillu ilitsersorneqassaatit
• Kalaallit Nunaanni digitalinngortitsinermi siuttuusumut Digitalinngortitsinermut Aqutsisoqarfimmut – peqataalissaatit, tassani suliagut pingaaruteqarlutillu siunertaqarluarput!

Uagut pilluta
Digitalinngortitsinermut Aqutsisoqarfimmi Kalaallit Nunaata digitaliunerulernissaa, pitsaanerulernissaa ataqatigiinnerulernissaalu suliaraarput. Suliagut immitsinnullu aalluppugut. Uagutsinni suleqatigiinneq, akisussaassuseqarneq, ilisimasanik avitsineq pitsaassuserlu oqaasiinnaanngillat, ulluinnarni malitaraagut.
Sulisut 35-t missaanniippugut, Naalakkersuisullu Siulittaasuata Naalakkersuisoqarfianut attuumassuteqarluta. Uani paasisaqarnerugit Digitalimik.gl

Unammilligassanut nutaanut piareersimavit?
Taava qinnuteqaat nassiuguk.
Apeqqutissaqarfik?
Immikkoortortaqarfimmi pisortaq Aputsiaq Gudbrand Petersen attavigiuk:
Mail: apu@nanoq.gl
Oqarasuaat: +299 345887
Tusarfiginissat qilanaaraarput!

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.