Ilisimatusarfiup Sulisoqarnermut Immikkoortortaqarfia sulisoqarnermut allaffissornikkut aqutsinermi sulisussamik/siunnersortissamik amigaateqarpoq, taanna pingaarnertut sulisoqarnermut allaffissornikkut aqutsinermi sulianik isumaginnittassaaq; aappaattullu akunnermusiaqartitsinermut tunngasunik suliaqartassalluni.

Atorfik isumaqatigiissuteqarnikkut piaarnerpaamik inuttalerneqassaaq.

Sulisoqarnermut Akissarsialerinermullu Immikkoortortaqarfimmi suleqatigiit marlunnut avissimapput, suleqatigiit siulliit suliat sulisunut qaammammusialinnut tunngasut isumagisarpaat, suleqatigiillu aappaasa suliat sulisunut akunnermusialinnut tunngasut isumagisarlugit.

Sulisoqarnermut allaffissornikkut aqutsinermi qaammammusiaqartitsinermik suliassaqarfiup iluani suliassat pingaarnertut isumagisassavatit, aammattaarli piffissat ilaanni pisariaqartitsisoqartillugu, nalinginnaasumik suleqatit soorlu feeriarlutik sulinngiffeqarneranni, suliassat akunnermusialerinermut tunngasut suliarisassavatit. Taamaattumik suliassaqarfinni taakkunani marlunni ilinniartinneqarneq ingerlanneqassaaq.

Sulisoqarnermut allaffissornikkut aqutsinermi minnerpaamik ukiuni marlunni sulinermik misilittagalimmik atorfissaqartitsivugut, akunnermusialerinermik suliassaqarfiup iluani misilittagaqaruit iluaqutaassaaq.

Uagut pilluta:
Sulisoqarnermut Akissarsialerinermullu Immikkoortortaqarfik 3,5-inik sulisoqarpoq, taakkualu suliassat sulisunut qaammammusialinnut aamma akunnermusialinnut tunngasut isumagisarpaat. Qaammammusialinnut suliassaqarfimmi atorfillit AC-fuldmægtigit marluupput, taakkua sulianik sulisoqarnermut tunngasunik ingerlassinerit, allaffissornerit kiisalu atorfinitsitsisarneq pillugu inatsiseqartitsinermut suliat isumagisarpaat.

Akunnermusialinnut suliassaqarfimmi akissarsialerisut/siunnersortit 1,5-iupput, taakkunani ataaseq ullup ilaannaa sulisarpoq, marluullutillu avataaniit ilinniartitsiartortunut akunnermusiaqartitsinernut tunngasut tamaasa suliarisarpat, tamatumunnga ilanngullugu Ilisimatusarfimmi sulisunut akunnermusialinnut allat tunngasut.

Atorfillit 110-t missaat aamma avataaniit ilinniartitsiartortartut akunnermusiallit ukiumut 80-it 100-llu akornanniittut immikkoortortaqarfimmi sullippagut.

Ilinnut piumasaqaatigut:

1. Sulisut atorfinitsinneqarnerinut soraarniuteqarnerannullu atatillugu sulisutigut aqutsinerit aamma suliat allaffissornikkut ingerlassassat tamaasa pingaarnertut isumagisassavatit, tamatumunnga ilanngullugit atorfinnut inuttassarsiuusiornerit aamma suliassat takkuttut.
2. Aappaattut isumagisassatit tassaapput avataaniit ilinniartitsiartortunut akunnermusialinnut allaffissornikkut ingerlassinerit sullissinerillu. 

Ilinnut naatsorsuutigisavut:

• Naapertuuttumik ilinniagaqarputit aamma atorfimmit assingusumit misilittagaqarputit, ilaatigut allaffissornermik tunuliaquteqarputit.
• Suleriaatsimi namminersorsinnaavutit ilikkariartorusussuseqarlutillu, aamma suliat assigiinngisitaartut tulleriiaarnissaat pikkoriffigaatit.
• Pingasuinnik oqaaseqaruit iluaqutaassaaq ukunani: kalaallisut, qallunaatut tuluttullu. 
• Qarasaasiatigut atortunut piginnaasaqarputit systeminullu nutaanut ilikkajallutit.

Neqeroorutigaagut:
Aaqqissugaanitsinni ilisarnaatigut tassaapput oqaloqatikkuminartunik, tunniusimalluartunik suleqateqarneq aamma akisussaaffilimmik qaffasissusilimmillu kiffaanngissuseqarneq, malunnartumillu sulisut akornanni sulianut atorfinnilu piginnaasaqartoqarluarnera.

Aaqqissugaanermi allanngoriartortuartumi suleqataalissaatit. Suliniutit ineriartornerat ilutigalugu, aaqqissugaanerup iluani avataanilu, ullut suliffiusut ilikkagaqarfiulluarnartut tamatigoortullu misigissavatit, taakkua siammasissumik aamma attaveqateqarfiupput. 

Attavissat/paasissutissat:
Atorfik pillugu paasisaqarnerorusukkuit Ilisimatusarfiup pisortaa Christine Tønnesenip attaviginissaanut tikilluaqqusaavutit oqarasuaammut uunga + 299 34 73 03
Ilisimatusarfik pillugu paasisaqarnerorusukkuit ugguuna atuarnerusinnaavutit: www.uni.gl.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.