Immikkoortoq:
FacebookTwitterLinkedInE-mailUdskriv

Qinnuteqarnissamut piffissaliussaq:
apriilip 28.-at, 2025

Saaffigisassaq:
Esben Møller Nielsen

Atorfinitsitsinerup suussusaa:
Piffissaq tamakkerlugu suliffik

Atorfinitsitseriaaseq:
Isumaqatigiissutit tunngavigalugit piumasaqaatit

Suliassaqarfik:
Ingeniøri pinngortitarlu pillugu ilisimatusarneq

Nunap immikkoortua:
Kommuneqarfik Sermersooq

Naalakkersuisoqarfik:
Departementet for Erhverv, Handel, Råstoffer, Justitsområdet og Ligestilling
Imaneq 4


Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job
Ujarassiornermut Immikkoortortaqarfik ujarassiuunik 1-2-nik sulisussarsiorpoq
Aaqqissuussaanermi nunanit tamalaanit sunnersimaneqartumi sulerusuppit? Kalaallit Nunaanni aatsitassanut suliassaqarfiup ineriartortinnissaa, aatsitassaqarsinnaanerata nittarsaannissaa aammalu ujarassiorluni asimi suliaqartarneq, soqutigaagit? Taava Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmi ujarassiornermut immikkoortortaqarfimmi ujarassiuutut/immikkut siunnersortitut atorfik ilinnoortuuvoq.

Atorfininnissaq Maaji 2025 imaluunniit isumaqatigiissuteqarneq malillugu.

Atorfik pillugu
Namminersorlutik Oqartussani aatsitassanut suliassaqarfimmi aammalu suliassani aatsitassarsiorfiutileqatigiiffinnut attuumassutilinni siunnersuinermut tunngatillugu pingaarutilittut sulisunngussaatit. Suliniutini arlalinni suliniutinut aqutsisutut sulisussaassuutit, aammalu immikkuullarissumik qillerummit qaqitanut toqqorsivittaassap atuutsinneqalernissaanut suliniutinut aqutsisooqataallutit aallartissallutit. Aamma nunanik tamalaanik suleqateqarnitsinni eqeersimaartumik ilaalissaatit, assersuutigalugit Nordisk Innovation, EU Mingutsitsinngitsumik Siuariartortitsineq aamma US State Department kiisalu GEUS peqatigalugu suleqatigiilluni suliniutit.

Suliassatit pingaarnertut tassaassapput:
  • Ujarassiornermi suliniutini assigiinngitsuni suliniutinik aqutsineq aammalu asimi suliaqarnermi peqataaneq.
  • Apeqquteqaatinut aatsitassarsiorluni misissuinermut aamma aatsitassarsiorfinnik ingerlatsinermut atasunut akissuteqartarneq, kiisalu ingerlatseqatigiiffiit sulinissamut pisussanut pilersaarutaannik, taakkualu ujarassiornermi nalunaarusiaannik nalilersuisarneq.
  • Nunani tamalaani nittarsaassinernik/nuisitsinernik aaqqissuussisarneq peqataasarnerlu.
  • Paasissutissiinerni nittarsaassinernilu najoqqutassanik suliaqarneq allatigullu Kalaallit Nunaata aatsitassaqarsinnaaneranik paasissutissiisarneq.
  • Allaffissornikkut suliassat assigiinngitsut, soorlu allakkianik nalunaarusianillu, aningaasaateqarfinnut qinnuteqaatinik il.il. suliaqartarneq.
Ilisarnaatitit
Takorloorparput ujarassiuutit ilinniarsimasutit imaluunniit assingusumik geoscience-tut tunuliaqutaqartutit, Ph.D-iuppat pitsaassalluni. Aatsitassarsiornermik inuussutissarsiuteqarnermit imaluunniit pisortat allaffissorneranni misilittagaqarneq iluaqutaassaaq, kisianni aamma ilinniarlutit naammasseqqammeruit qinnuteqarnissarnut tikilluaqqusaavutit. Pingaarnerpaajupput nutaanik sammisaqarusunneq, ilinniarsimanikkut piginnaaneqarneq aammalu ataqatigiissaarillaqqissuuneq suleqatiginnillaqqissuunerlu.

Inuttut inussiarnersuuvutit tuniusimasuullutillu, aammalu ajornartorsiutit nutaat sukkasuumik paasisimaarilersinnaavatit. Suliniutinut sammisumik sulinermik aaqqissuussisarneq misilittagaqarfigaat, aammalu aaqqissuussamik namminersorlutillu sulisinnaallutit. Suleqatiginnilluarnissaq oqaaseqatigiiliornissarlu pikkoriffigaatit, ilanngullugu tuluttut pikkorissuseqarluarlutit.

Kalaallit oqaasii kulturiallu ilisimasaqarfigigukkit iluaqutaassaaq. Qinnuteqartunut Kalaallit Nunaata avataaneersunut, sungiusimasat saniatigut allanik kulturikkut atugaqarluni sulinissamut inuunissamullu piginnaaneqarneq, kajumissuseqarneq piumassuseqarnerlu pingaartinneqassapput.

Neqeroorutigaagut
Immikkoortortaqarfimmi ineriartortuartumi sioqqutaarisumillu ilaalissaatit, tassani inuit ataqatigiilluarlutik aammalu suliatigut isumasioqatigiinnissaq periarfissaqarluarluni.

Pissarsiarissavatit:
  • Suliffik pissaganartoq, unammillernartoq tamatigoortorlu.
  • Inuttut suliatigullu ineriartornissavit sunniuteqarfiginissaa periarfissaqarluarpoq.
  • Akisussaasuulluni annertuumik kiffaanngissuseqarneq.
  • Sulinermi atugassarititaasut allanngorartinneqarsinnaasut.
Angalasarnerit pillugit
Ilaatigut nittarsaassinermut, asimi suliaqarnermut, ilinniaqqinnermut, ataatsimeersuarnernut kiisalu nakkutilliinernut atatillugu Kalaallit Nunaanni avataanilu angalasarnissaq akunnattumik annertussuseqassasoq naatsorsuutigineqartariaqarpoq.

Uagut pilluta
Ujarassiornermut Immikkoortortaqarfiup inissisimanerani pingaarnermi ilaatinneqarput:
  • Kalaallit oqartussaasuinut ujarassiornermi ilisimatuussutsikkut siunnersuineq
  • Ujarassiornermi aatsitassarsiorluni misissuineq aamma paasissutissanik nalunaarsukkat qaffasissumik pitsaassusilinnik peqalersitsinissaq
  • Kalaallit Nunaanni aatsitassanut periarfissaqarfiusunut nittarsaassineq
Naalakkersuisoqarfimmi sulisut 40-t missaanniippugut. Naalakkersuisoqarfiup aatsitassanut suliassaqarfimmi pingaarnertigut pilersaarusiorneq isumagisaraa. Aatsitassanut tunngasunik suliaqarnerit pillugit politikkikkut oqallinnissanut ilisimasassanut tunngavissat suliarineqarneranni peqataasarpugut aammalu aalajangiinerit atuutsilertarpagut. Tamatuma saniatigut Naalakkersuisoqarfiup ataani immikkoortortat marluupput: Aatsitassanut Ikummatissanullu Aqutsisoqarfik aamma Atuisartoqarnermut Unammilleqatigiinnermullu Aqutsisoqarfik.

Atorfik aaqqissuussaanermi Ujarassiornermut Immikkoortortaqarfimmiippoq, tassaniillutik immikkoortortaqarfimmi pisortaq 1 aammalu ilisimatuussutsimi sulisut 11. Ujarassiornermut Immikkoortortaqarfiup Aatsitassanut Ikummatissanullu Aqutsisoqarfik, De Nationale Geologiske Undersøgelser for Danmark og Grønland (GEUS), allallu Kalaallit Nunaanni nunanilu allani kattuffiit qanimut suleqatigai.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.
Namminersorlutik Oqartussat  |  Imaneq 4, Postboks 1015  |  3900 Nuuk  |  Telefon (+299) 34 50 00  |  E-mail stillinger@nanoq.gl

www.naalakkersuisut.gl  |    Facebook  |    LinkedIn