Ilisimatusarfiup Oqaasilerinermut, Atuakkialerinermut Tusagassiuutilerinermullu Immikkoortortaa ilinniakkanik ataqatigiissaarisutut atuuffeqartussamik studieadjunktissarsiorpoq.

Atorfiup isumaqatigiinnikkut piaartumik inuttalerneqassaaq.

Ilisimatusarfiup Oqaasilerinermut, Atuakkialerinermut Tusagassiuutilerinermullu Immikkoortortaani ilinniartitsinermik aamma ilinniartunut tunngasunik allaffissornikkut sulianik ingerlataqartartussamik studieadjunktissarsiorpugut.

Oqaasilerinermut, Atuakkialerinermut Tusagassiuutilerinermullu Immikkoortortaq ilisimatusarnerup ilinniartitsinerullu iluanni oqaatsit kulturillu tungaatigut assigiinngisitaartumik avatangiiseqartitsivoq 30-it missaannik ilinniartulik tallimanillu piffissaq tamakkerlugu sulisulik. Immikkoortortaq bacheloritut ilinniakkamik ukiunik pingasunik sivisussusilimmik aamma ukiuni marlunni kandidatitut ilinniakkamik neqerooruteqarpoq. Immikkoortortami ilinniakkani ilisimatusarnermilu qitiutinneqartut Kalaallit Nunaannut Issittumuttaaq tunngatinneqarput, suleqatigineqartullu tassaallutik Amerika Avannarlermeersut, Avannaamioqatigiit aamma Europap sinneraneersut.  

Immikkoortortami ilinniartitsinerit kalaallisut, qallunaatut tuluttullu ingerlanneqarsinnaapput.

Immikkoortortaq Kulturimik, Oqaatsinik Oqaluttuarisaanermillu Ilisimatusarfiup ataani inissisimavoq pingasunillu allanik aamma immikkoortortaqarluni:

• Inuiaat Kulturiannut Oqaluttuarisaanerannullu Immikkoortortaq
• Teologiimut Immikkoortortaq
• Nutserinermut Oqaluttaanermullu Immikkoortortaq

Piginnaasassatut piumasaqaatit
Naatsorsuutigaarput illit:

• Kandidatitut qaffasissusilimmik ilisimatusarfimmi naapertuuttumik ilinniarsimasutit
• Kalaallit atuakkiaannik oqaluttuaateqarnerannillu ilisimasaqarluartutit 
• Atuakkiat pillugit teoriinik nunarsuarmioqatittalu atuakkiaannik ullutsinnut naleqquttumik ilisimasaqarluartutit
• Allatanik misissueqqissaarinermi kiisalu Kalaallit Nunaanni atuakkiat oqaluttuarisaaneranni ilinniartitsinermik aamma/imaluunniit ilisimasanik paasissutissiortarnermi misilittagaqarluartutit
• Ilitsoqqussatut kalaallisut oqaaseqartutit, kiisalu qallunaatut tuluttullu oqaatsinik qaffasissumik atuisinnaasutit

Suliassat
Suliassatit pingaarnerit tassaassapput:

• Fagini soorlu oqaluttuaateqartarnermut aamma allannermi kulturimut, atuakkiat oqaluttuarisaanerannut aamma allatanik misissueqqissaarinermut tunngasuni bacheloritut qaffasissusilimmik ilinniartitsisarneq
• Ilinniartunik bachelorinngornianik ilitsersuisarneq soraarummeersitsisarnerlu
• Immikkoortortap pisortaa suleqatigineratigut Oqaasilerinermut, Atuakkialerinermut Tusagassiuutilerinermullu Immikkoortortami ilinniakkanut skemaliortarneq aamma soraarummeernissanik pilersaarusiortarneq
• Immikkoortortami sulianut tunngasunik aamma ataatsimuualaartitsinernik aaqqissuussinernut pilersaarusioqataasarneq ingerlasseqataasarnerlu
• Ilinniartitsiartorlutik tikeraanik ulluinnarni attaveqateqartarneq ilitsersuisarnerlu
• Immikkoortortap aamma Ilinniartunik Sullissiviup akornanni attaveqarfittut atuuffeqarneq
• Immikkoortortap suliassaqarfiata iluani ilisimatuussutsikkut ilisimasanik ingerlatitseqqiisarneq
• Allaffissornikkut suleqatigiillu akornanni suleqatigiinnerni peqataaneq

Suliatigut ineriartornissamut atorfik pissanganartunik periarfissiisoq neqeroorutigaarput:

• Sullivik isumassarsiorluarfiusinnaasoq 
• Nammineq suliassarisanut sunniuteqataasinnaaneq 
• Suliatigut ilinniartitsinerullu iluanni ineriartornissamut periarfissat 

Qinnuteqaat
Studieadjunktitut atorfininnissamut qinnuteqaat, allaganngorlugu qinnuteqaatip saniatigut, ukuninnga imaqassaaq:

Ilanngussaq 1:   Curriculum Vitae.
Ilanngussaq 2:   Soraarummeersimanernut uppernarsaatit.
Ilanngussaq 3:   Inuit pingasut tikillugit oqaaseqaatinik aallerfiusinnaasut attaviginissaannut  paasissutissanik tunniussineq.
Ilanngussaq 4:   Ilaatigut saqqummersissimasat aamma/imaluunniit ilaatigut ilisimatuutut misissuilluni paasissutissiornermilu suliat kiisalu ilinniartitsisimanerit allattorsimaffiat

Atorfinitsitsinermi ingerlatseriaaseq
Qinnuteqaatit tiguneqartut tamarmik atorfinitsitsinermut ataatsimiititaliamit suliarineqassapput.

Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorit naliliinerat tunngavigalugu studielektoritut atorfittut aalajangersimasunngorlugu atorfinitsinneqarsinnaavoq.

Attavissat/paasissutissat:
Atorfik pillugu paasisaqarnerorusukkuit Kulturimik, Oqaatsinik Oqaluttuarisaanermillu Ilisimatusarfimmi instituttip pisortaata Mari Kleistip attaviginissaanut tikilluaqqusaavutit oqarasuaammut uunga +299 38 56 45.
www.uni.gl-ikkut Oqaasilerinermut, Atuakkialerinermut Tusagassiuutilerinermullu Immikkoortortaq pillugu atuarnerusinnaavutit.

Ilisimatusarfik pillugu
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut aqqaneq marluupput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
 
Ilisimatusarfik sisamanik instituteqarpoq:

• Ilinniartitsinermik Ilisimatusarfik
• Inuiaqatigiilerinermik, Aningaasaqarnermik Tusagassiornermillu Ilisimatusarfik
• Kulturimik, Oqaatsinik Oqaluttuarisaanermillu Ilisimatusarfik
• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.