Siunissami Kalaallit Nunaanni inuussutissarsiornissamik ilusilersueqataarusuppit? Inuussutissarsiutinik ineriartortitsinnissaq, avammut nioqquteqartarnermi suliaqarfinnik nutaanik ineriartortitsinissaq imaluunniit politikkikkut suliaqarfimmi inatsisitigut siunnersuinissaq suliaqarfigerusuppiuk? Inuussutissarsiutinut, niuernermullu suliaqarfiup iluani pilersaarusiorluni ineriartortitsinissaq, oqartussallu suliassaataannik suliaqarusussuseqarpit – siuariartortitsinissamullu aamma nutaaliornissamut  sinaakkutinik nukittuunik pilersitsinissamut taperseerusuppit? Taamaassimappat Inuussutissarsiutinut aamma niuernermut immikkoortortami marlunnik-pingasunik suleqatissarsiornitsinni immaqa illit suleqatissaraatsigit.

Kinaaninnut, sulerisinnaanissannillu kissaatigut
Inuussutissarsiutinut aamma niuernermut immikkoortortami suleqatigiinni qanimut suleqatigiippugut, ilutigisaanilli sulisut ataasiakkaat namminneq suliaqarfimminni annertuumik akisussaaffeqarlutik. Suleqatigiinneq, namminerlu sulisinnaaneq pingaartippagut – suleqatinillu aamma illup avataani ingerlatsisunik oqaloqatiginnissinnaasunik, aammali namminneelutik sulianik piviusunngortitsisinnaasunik, piviusunngortitserusussuseqartunillu suleqatissarsiorpugut.
Inuussutissarsiutinik siuarsaanermik, sermip aamma erngup avammut nioqqutigineqarnerinik kiisalu inatsisitigut siunnersuinermik suliaqarnitsinni ikiuutaasinnaallutik pimoorussisunik, alapernaatsunillu suleqatissarsiorpugut. Iliuuseqarusussuseqartuuvutit, tassuugulu annertuumik akisussaaffeqalernissannut piareersimallutit, suliniutillu isumassarsiarinerinit atuutsilersinneqarnissaannut malittarisinnaallugit. Eqaatsumik sulisinnaassuseqarputit, suliat arlallit ataatsikkut suliarisinnaavatit, soorluttaaq inuttut ineriartornissat aamma allaffik immikkoortortaqarfillu tamaat isigalugu ineriartortinneqarnissaanut piumassuseqarlutit.
Tulliuttut inuttalertussaavagut:

• Suleqatigiinnermik, najukkamilu tunngavissiinissamik ukkataqarluni inuussutissarsiutinik ineriartortitsisoq:

Inuussutissarsiutinik ineriartortitsinissaq siammasissumik soqutigisaraat, najukkamilu naleqalersitsinissaq kajumissutigalugu. Ingerlatsisut akimorlugit – inuussutissarsiutilinnit aamma kommuninit, Nalik Venturesimut, soqutigisaqaqatigiinnullu allanut – suleqateqarsinnaavutit, Kalaallit Nunaannilu tamarmi aallarnisaanermut, inuussutissarsiutinillu siuarsaanermut nukittorsaataallutik suliniutinik nutaanik ineriartortitseqataanissamut periarfissat takusinnaallugit.
 

• Avammut nioqquteqartarnermi piumassusilik, niuernermillu paasisimasalik:

Allat periarfissatut isiginngisai, periarfissatut isigaatit. Inuussutissarsiutinut immikkoortortat nutaat – sermip, erngullu avammut nioqqutigineqarnerat –  suliarissallugit merserinngilat, sermersuarmiillu periarfissaasup piviusunngortinneqarnissaanut taperseerusussuseqarlutit. Imaassinnaavoq aningaasaqarnermut, attaveqaasersuutinut, pinngortitami isumalluutinut imaluunnit nunani assigiinngitsuni niuerfiit misilittagaqarfigigitit, avammullu nioqquteqartarnermi Kalaallit Nunaata nioqquteqartartutut ineriartortinneqarnissaanut, inissinnissaanullu piumassuseqarlutit.
 

• Politikki ilisimasaqarfigalugu, periusissiornerlu tappiffigalugu inatsisinut tunngatillugu siunnersuisoq:

Inatsisilerinermik tunuliaqutaqarputit, inatsisilerinerullu aamma politikkip, inuussutissarsiutinillu ineriartortitsinerup akornanni suliaqarnissat nuannaralugu. Inatsisit, tusarniutit, isumaqatigiissutillu suliaqarfigisinnaassavatit, politikerinillu sullissisinnaassallutit – ilutigisaanillu Kalaallit Nunaanni inuussutissarsiutinut, nunanilu assigiinngitsuni niuerfinni atassuteqaatinut tapersersuillutik periusissianik, inatsisinillu ineriartortitsiseqataallutit. Inatsisitigut ajornartorsiutit pisariusut ersarissumik, eqqortumillu paasissutissiarisinnaavatit, inatsisilerinerlu qitiusumik inissisimalluni nunami, nunanillu assigiinngitsunik suleqateqarneq kajumissutigalugu.

Tulliuttumi piginnaasat ilaannik piginnaasaqarnissat kissaatigaarput

• Attuumassuteqartumik ilinniaqqiffiusumik ilinniagaqarneq – ajornanngippat kandidatitut, kisianni aamma suliatigut allamik tunuliaquteqartut qinnuteqarnissaannik kaammattorpagut
• Aaqqissuussisimanermi politikkikkut aqutamit aamma/imaluunniit namminersorluni inuussutissarsiutilinnit misilittagaqarneq
• Inuussutissarsiutinut, niuernermullu politikkinut paasisimasaqarluarneq
• inuussutissarsiornermi aningaasaqarnermut aamma/imaluunniit Inuiaqatigiit aningaasaqarnerinut ilisimasaqarneq iluaqutaassaaq
• Kalaallit Nunaanni inuiaqatigiinnut tunngasunik, inuussutissarsiutinullu ilisimasaqarneq
• Pisortat sulianik suliaqartarnerinik, oqartussallu suliassaataannik misilittagaqarneq
• Kalaallisut, qallunaatut, tuluttullu oqaaseqaruit ilaqutaassaaq – piumasaqaataanngilarli.

Kikkuuvugut, sulerisarpugullu
Inuussutissarsiutinut aamma niuernermut immikkoortortaq Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup ataaniippoq. Akimortumik suleqatigiiuvugut – inatsisilerinermit aamma aningaasaqarnermit, nunat assigiinngitsut akornanni niuernermut aamma suliniutinik aqutsinermut – assigiinngitsunik tunuliaqutalinnut 15-inut amerlassusilikkat, Kalaallit Nunaannilu inuussutissarsiorneq nukittorsassallugu anguniagaqatigiilluta.
Pilersaarusiukkamik ineriartortitsinissamik, sulianillu suliaqarnissamut uagutsinni periarfissaqassaatit. Inuussutissarsiutinut aamma niuernermut politikkinit, takornarialerinermit, avammut nioqquteqartarnerup siuarsarnissaanit, uumassusillit sananeqaataasigut kingornuttagaasunik isumalluutinut, nunat assigiinngitsut akornanni niuerneq aamma suleqatigiinneq suliarisarpagut. Suliarisartakkagut siammasipput, najukkamilu ingerlatsisunik aamma nunat assigiinngitsut akornanni suleqatigisanik attaveqassallutit.

Akimortumik siunersiueqatigiittarluta, ataatsimullu kivitseqatigiittarluta suliatigut nukittuumik inissisimavugut – kisiannili aamma nammineersinnaaneq, suliniuteqarsinnaanerlu inissaqartinneqarluni. Ulluinnaat nikerarput, tulliuttullu suliarinissaannut periarfissaqassallutit:

• Inuussutissarsiutinut, niunernermullu periusissianik ineriartortitsineq, atuutsilersitsinerlu
• Sulianik suliaqarneq, politikerinik sullissineq, matumani Naalakkersuisut isummernissaannut tunngavissiorneq, tusarniutinut akissuteqaasiornerit, § 37-lu naapertorlugu apeqqutinut akissuteqaasiornerit
• Akimortumik suliniutinik suliaqarneq, ilaatigullu inuussutissarsiutilinnik, kommuninik, naalakkersuisoqarfinnik allanik, namminersorlutik oqartussat ingerlatseqatigiiffiutaannik, nunanilu assigiinngitsuni oqartussanik aamma aaqqissuussisimanermik suleqateqarneq

• Atorfiit, suliassatillu apeqqutaatillugit suliat illit suliaqarfinnut atasut

Sulinermi avatangiiserissaarneq pitsaanerpaanik angusaqartitsisartoq upperaarput – tassanilu suliatigut piginnaasaqarneq, suleqatigiinneq, atugarissaarnerlu annertuumik pingaartillutigit.

Atorfinitsitsinissaq pillugu
2026-mi januaarip aallaqqaataani imaluunniit ersarinnerusumik isumaqatigiissuteqarnikkut atorfik inuttalerusunneqarpoq.
Piginnaasanik, misilittakkanillu naliliineq tunuliaqutaralugu fuldmægtigitut, immikkut siunnersortitut imaluunniit nisiunnersortaanertut atornitsitsisoqassaaq.

Oqaloqatigiinnerit ataavartumik ingerlanneqassapput.

Apeqqutissaqarpit
Atorfik pillugu annertunerusumik paasisaqarusukkuit, Inuussutissarsiutinut aamma niuernermut immikkoortortami pisortaq Marte Lona mailimut: mlon@nanoq.gl-imut imaluunniit oqarasuaammut +299 346568-imut attavigisinnaavat.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.