Pingaarutilimmut peqataalerit - Pilutami Sisimiuniittumi immikkoortortami aqutsisussarsiorpugut
Inuusuttut inuuneranni allanngueqataarusuppit - aammalu ulloq unnuarlu angerlarsimaffimmik allannguinermi ilusileeqataarusuppit? Taava immaqa illiuvoq Pilutami immikkoortortaqarfimmi, niviarsiaqqanut 11-17-inik ukiulinnut immikkullu pisariaqartitsisunut, ulloq unnuarlu angerlarsimaffimmi immikkoortortami aqutsisussatut ujartugarput.
Atorfininnissamut ulluliussaq: 1. Decembari 2025, imaluunniit isumaqatigiinneq aallaavingalugu.


Pilutaq pillugu
Pilutaq Sisimiuni inissisimavoq, nunatta illoqarfiisa annerpaat tulliat kiisalu Isumaginninnermut, Ilaqutariinnermut Pinaveersaartitsinermullu Naalakkersuisoqarfiup ataaniilluni. Meeqqanik inuusuttunillu sumiginnagaasimasunik Kalaallit Nunaat tamakkerlugu suminngaanneerfeqartunik tigusisarpugut, perorsaariaasitsinnilu toqqissisimaneq, aaqqissugaaneq atassuteqarnissamullu suliniuteqarneq aallaavigalugit periuseqarpugut.
Inuusuttut sullitagut:
• Sumiginnagaasimasarput
• Atassuteqarniarnermut ajornartorsiuteqartarput
• Sakkortuumik pissusilersuuteqartarput imminullu naleqartinnerat annikilluni
• Inoqasersornikkut misigissutsikkullu ajornartorsiuteqartarput
• Toqqissisimanermik, aalaakkaanermik inersimasunillu tutsuiginartunik avatangiiseqarnissaminnik pisariaqartitsisarput.

Suliffeqarfik ineriartortoq
Nutaamik aqutsisutaarnikuuvugut - Suliassaqarfimmut sammisumik, suleqatigiinnermut aalaakkaannermullu aallaavilimmik Pilutaq nutarterlugu inerisaleruttorparput. Tamanna isumaqarpoq atorfimmi aallartiinnassanngitsutit, inerisaanermili suleqataanikkut aallarneeqataassasutit.
Suleqammik aalajaatsumik tunniusimasumillu suleqatissarsiorpugut:
• Qanilaartumik
• Ataqatigiisitsilernissamik nuannarisalik, nukissamik isumassarsianillu tunisinissamik nuannarisalik
• Ulloq unnuarlu angerlarsimaffimmut ineriartortitseqataarusuttumik
• Inuusuttut inuuneranni allanngueqataanissamut pimoorullugu suliniuteqarusuttumik

Immikkoortortami aqutsisutut suliassatit
Aqutsisoqatigiinni pingaaruteqartumik inissisimassaatit aamma:
• Ulluinnarni aqutsineq pisortaq peqatigalugu ingerlatissavat
• Suliffissat pilersaarusiortassavatit, aningaasaqarneq aaqqissugaanerlu malitseqartitsivigisarlugit
• Sulisut ataatsimiinnissaat, meeqqat ataatsimeeqatiginissaat oqilisaassillunilu oqaloqatigiinnissat pilersaarusiortassavatit
• Suliatigut pitsaassuseq, ulluinnarnilu sulinermi ajunngitsumik ingerlaneq qulakkeertassavatit
• Suleqatinut, najugaqartunut, angajoqqaanut avataaniillu suleqatinut ataqatigiissaarisuussaatit
• Killiffinnik nalunaarusiat inuusuttunullu ineriartornissamut pilersaarusiornerit suliarisassavatit
• Sulisut nutaat ilisaritillugillu tapersersortassavatit
• Aqutsisutut akisussaaffiit ilaattut sillimasutut (bagvagt) inissisimasassaatit
• Illuaqqiarnissamut najugaqartullu sammisaqaqatiginissaannut peqataallutillu pilersaarusiortassaatit

Naatsorsuutigaarput illit:
• Perorsaasutut (assingusumilluunniit) ilinniarsimasutit, aqutsisutut ilinniagaqaruit misilittagaqaruilluunniit pitsaassaaq
• Meeqqanik inuusuttunillu angerlarsimaffiup avataanut inissinneqarsimasunik sullissinermik misilittagaqartutit
• Suliatigut nukittussuseqartutit, ersarissuusutit aamma siuttuusinnaassuseqartutit
• Kalaallisut oqalullutillu allassinnaasutit
• Peqatigaluta ilinniarnissat ineriartornissallu piumassuseqarfigigitit
• Biilernermut allagartaqartutit (piumasaqaataanngilaq, iluaqutaassaarli)

Neqeroorutigaarput:
• Isumalimmik sulineq allanngueqataalluarfiusinnaasoq
• Suliffeqarfik ineriartortoq - kulturikkut perorsaanikkullu suliaqarnermi sunniuteqaqataaffiusinnaasoq
• Suleqatit pikkorissut tunniusimasullu ataatsimut meeqqanik pitsaasumik atugaqartitsiumasut
• Suliatigut ataatsimoorneq ilinniarnermik atugarissaarnermillu qitiutitsiffiusoq
• Sapaatip akunneranut nalunaaquttap akunnerini 40-ni sulineq, pingaarnertut ullukkut sulineq

 
Pingaarutilik
Atorfik inatsisit naapertorlugit meeqqanik pinerliisimannginnermut pineqaatissinneqarsimannginnermullu allagartaqarnermik piumasaqaatitaqarpoq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Sukumiinerusumik paasisaqarusuppit?
Pisortaq Miacecilia Munch Ingemann attavigisinnaavat
📞 +299 58 03 32
✉️ forst@pilutaq.gl
Qinnuteqarfissap ullua kingulleq: 20. novembari 2025

Uummateqarfiusumik, akisussaaffeqarfiusumik isumalimmillu suliffissarsioruit massakkut periarfissaq tigujuk. Qinnuteqarit pingaarutilimmillu suliaqarfimmi peqataalerit


Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.