Avatangiisinut Upalungaarsimanermullu Immikkoortortaqarfik pikkorissumik tunniusimasumillu suleqatissarsiorpoq – upalungaarsimanermut suliassaqarfimmi misilittagaqareersimasuusinnaavoq AC-fuldmægtigitut, immikkut ittumik siunnersortitut imaluunniit attuumassutilimmik piginnaasaqartutut atorfinissinnaasumik. Upalungaarsimanermut suliassaqarfimmi soqutiginninnerit pingaaruteqarpoq, piginnaasatilli atorfimmut naleqquppata sumi ilinniarsimanerit apeqqutaassanngilaq.

Suliffeqarfik naatsumik oqaluttuaralugu
Avatangiisinut Upalungaarsimanermullu Immikkoortortaqarfimmi, Pinngortitamut Avatangiisinullu Naalakkersuisoqarfiup ilaaniittumut suleqataalissaatit. Immikkoortortaqarfimmi sulineq pissanganartuuvoq, suliassatigut unammillernartoq ineriartornissamullu periarfissaqarfiulluartoq. Suliffeqarfimmi pitsaasunik suleqateqarfiusumut, pingaartorsiorfiunngitsumut, toqqissisimanissamik ineriartornissamillu pingaartitsiffiusumut ilaalissaatit.

Naalakkersuisoqarfik 30 miss. Sulisoqarpoq, immikkoortortaqarfinnullu marlunnut avinneqarluni (Pinngortitamut Immikkoortortaqarfik aamma Avatangiisinut Upalungaarsimanermullu Immikkoortortaqarfik). Aatsitassanik Suliassaqarfinnut Avatangiisinut Aqutsisoqarfik, Pinngortitaleriffik.

Suliassatit
Immikkoortortaqarfiup qaartitsinernut tunngassuteqartut, ajornartoornermik aqutsinerit, kommunini annaassiniaanissamut upalungaarsimanerit naalagaaffimmilu isumannaatsuunissamut tunngasut suliarisarpai. Kalaallit Nunaanni isumannaallisaanissaq toqqissisimatitsinissarlu anguniarlugit kommunit naalagaaffimmilu oqartussat suleqatigaagut. Suliassaqarfik pingaarutilerujussuaq ukkatarineqarluartorlu.

Upalungaarsimanermut immikkoortortaqarfiup iluani ingerlatsinermut ineriartortitsinermullu tunngasut suliarineqartarput. Taakku ataanni inatsisit, siunnersuinerit upalungaarsimanermullu immikkoortortaqarfiup iluani sulissussinerit. Ingerlatsinikkut suliassat ilaanniittut qaartiterutinut tunngasut initoorujussuupput, tassa qaartiterisut pisortaannut suliffeqarfinnullu akuersissutit suliarineri, qaartiterutinullu tunngatillugu innuttaasuniit aammalu oqartussaniit saaffiginnissutit suliarineri. Kalaallit Nunaat tamakkerlugu kommunini annaassiniarnissamut upalungaarsimanernut aamma qaartartunik atuisunut, nalunaaqqaarluni nalunaaqqaarnaniluunniit nakkutilliiartorneq suliassat ilagissavaat.   

Peqqinnissaqarfimmik, Kalaallit Nunaanni Politiit, Issittumi Sakkutooqarfik kommuninilu upalungaarsimasut suliami pingaarutilittut immikkoortortap ineriartortitsinikkut suliaqarneranut pingaaruteqarput, politikkikkullu pingaarnersiuinerit ilaatigut tulluarsarlugillu ineriartortinneqassapput.

Kalaallit Nunaata imartaani mingutsitsinermik akiuiniarneq immikkoortortaqarfiup isumagisarivaa kommuninilu annaassiniarnissamut upalungaarsimasut suleqatigalugit. Taamaammat immami mingutsitsineqartillugu, immikoortortaqarfimmi pisortaq ilagalugu, Kalaallit Nunaanni Upalungaarsimanermut Akisussaasunut peqataasassaatit. Kalaallit Nunaanni Upalungaarsimanermut Akisussaasut Kalaallit Nunaanni ajornartoornermi aqutsisutut qiterlersaavoq.   

Matuma saniatigut Kalaallit Nunaata Upalungaarsimanermut ataatsimiititaliaanut allatsitut suliaqarnermi peqataasassaatit. Kalaallit Nunaanni Upalungaarsimanermut ataatsimiititaliaq Kalaallit Nunaanni ajornartoornermi aqutsisutut qaffasinnerpaavoq, Kalaallit Nunaannilu upalungaarsimanermut tunngasunik apeqquteqartoqartillugu Naalakkersuisunut siunnersuisarluni. Taamaammat Upalungaarsimanermut ataatsimiititaliaq annertunerusunik ajutoortoqartillugu ajunaarnersuaqartilluguluunniiit aggersarneqartarpoq. Suliaq tamanna immikkoortortaqarfimmi pisortaq naalakkersuisoqarfimmilu pisortaq qanimut suleqatigalugit ingerlanneqassaaq.  

Piginnaasat soqutigisallu aallaavigalugit suliassat ilaatigut tassaassapput:

• Politikkikkut atortussanngortitsinermi isummernissanut suliaqarneq
• Suliassaqarfimmi ataatsimi arlalinniluunniit piginnaasat, atorfissaqartitsineq soqutiginninnerluunniit apeqqutaatillugit suliassanik isumaginninneq.
• Naalakkersuinikkut kiffartuussinerit, taakkunani allakkiorneq aalajangiiffigisassallu isummernissamut tunngavissiat ilanngullugit.
• Namminersorlutik Oqartussat oqartussaaffii akimorlugit tusarniaanernik ataqatigiissaarineq
• Inatsisinik, nalunaarutinik maleruaqqusanillu suliaqarneq iluarsaassinerlu
• Kommuninut suliffeqarfinnullu siunnersuineq
• Immikkoortortaqarfimmiit atortussat, aqutsisunut Naalakkersuisoqarfimmullu saqqummiunneqartussat pitsaassusaannik qulakkeerinninneq
• Ineriartortitsinermi suliani attuumassutilinni aqutsinernut akisussaaffeqarneq, suliatigut piginnaasatit apeqqutaallutik
• Upalungaarsimanermut suliaqarfiup iluani paasititsiniaaneq
• Qaartiterutissaasivinnik akuersissutinik atulersitsineq kiisalu nakkutilliineq
• Upalungaarsimanermut sungiusarnermut assigiinngitsunut pilersaarusiornernut naammassinninnernullu peqataaneq
• Upalungaarsimanermut pilersaarutinut assigiinngitsunut suliarinninnernik qularnaarinninneq
• Ajutoornerni annertuuni ajornartoornermi aqutsinermi peqataaneq

Piginnaasat
Avatangiisinut suliassaqarfik nuannaraat, namminersorsinnaavutit, eqaatsumik aaqqiisinnaavutit, nutaanik suliaqarnissamut piginnaaneqarfeqarputit, ilusiliussat allanngutsaaliorsinnaavatit suliatillu paasisimaarisinnaallugit. Eqqissisimasuuvutit, unammilligassat kajumilersittarpaatsit, pisussaaffitit naammassisarpatit, unneqqarissuuvutit isumagissaartuullutillu. Suliassaqarfiit ilaat immikkut ilisimasaqarfigisinnaavat imaluunniit arlalitsigut ilisimasaqarfigisinnaavatit. Suliassat pillugit anguniagaq anguniartillugu suliffiup iluani avataanilu suleqateqartoqartassaaq taamaammat ileqqorissaartuunissat, kiffartuussinermik pingaartitsinissat aammalu oqaasiliornermut attaveqaqateqarnermullu piginnaaneqarluarnissat pisariaqarpoq. Naapertuuttunik ilitsersuunneqassaatit. Atorfinissaguit isumannaallisaanikkut akuerineqarsinnaanissat hemmelig-mut atorfeqarninnilu isumannaallisaanikkut akuersissutivit attassinnaanissaa piumasaqaataavoq.

Piginnaasat iluaqutaasussat:

• Upalungaarsimanermut suliassaqarfimmi ataatsimi arlalinniluunniit suliassaqarfik misilittagaqarfigissagit soqutigissagillu
• Sulianik aqutsinermik suleriutsinillu aalajangersimasunik misilittagaqarneq
• Aaqqissuussaanermi naalakkersuinikkut aqunneqartumi sulinermik misilittagaqarneq
• Pisortaqarfimmi ingerlatsineq siunnersuisutulluunniit suliffeqarfimmi misilittagaqarneq
• Isummerfissat pisariusut oqaatsit ersarissut atorlugit ingerlatitseqqiisinnaaneq
• Suleqatikkuminartuuneq ataatsikkullu amerlasuunik suliaqarsinnaaneq

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik.  Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.