Tamat isiginnissuseqarlutit, isumassarsiallu timitalersinnaallugit ulluinnarni ulapaarfiusumi  sulisinnaassuseqarpit? Taamaassimappat immaqa illit atorfissaqartippatsigit. Attaveqaasersuutinut Immikkoortortaqarfimmi suliat siammasimmata, suliassanik amerlasuunik ataatsikkut ingerlatsisinnaasumik pikkorissumik siammasissumik ilisimasalimmik sulisussarsiorpugut.

Ilinniagartuusutit naatsorsuutigaarput, sumulli ilinniarsimassuseq aalajangiisuunngilaq. Taamaattorli ulluinnarni ulapaarfiusumi eqqissisimasumi, tamat isiginnissuseqartumillu sulisinnaanissat, ilisimasatillu atorsinnaassagitit aalajangiisuuvoq.
Suliassat assigiinngitsorujussuupput, suliassallu allaffimmi pisortat aamma immikkoortortaqarfimmi pisortaq suleqatigalugit ataavartumik aaqqissuunneqartassallutik, ilutigisaanillu nammineq suliniuteqarsinnaanissaq inissaqartinneqassalluni.

Suliassat
Atorfimmi suliassat siammasissut akisussaaffigissavatit, soorlu:

• Immikkoortortaqarfik akimorlugu suliassat ataqatigiissaarneqarnissaat
• Tusarniutinut akissuteqaatissanik siunnersuusiornerit
• Inatsisinik aamma/imaluunniit aningaasaqarnermut tunngasunik ilisimasaqartariaqarluni allakkianik suliaqarneq
• Pinerluuteqarsimannginnermut uppernarsaatit pillugit suliassat isumagineri
• Ataatsimiinnissat, saqqummiussinissat il.il. pilersaarusiorneri aamma ataqatigiissaarneri
• Ataatsimiinnerni attuumassuteqartuni imaqarniliortutut peqataaneq
• Aningaasaqarnermik naligiissaarineq
• Missingersuutinik malinnaaneq
• Suliassat takkussuuttut assigiinngitsut

Sulininni immikkoortortaqarfimmi allaffinni marluusuni ingerlatat allat tapersersugassaraatit, taamaattumillu suleqatitit qanoq pitsaanerpaamik tapersersornissaannut ilusilersueqataanissannut periarfissaqarlutit.

Ilinnit naatsorsuutigisagut
Pingaartipparput:

• Suliat assigiinngitsut ataatsikkut suliarisinnaagitit, qaninnertullu pisortarisat peqatigalugu ataavartumik pingaarnersiuisinnaasutit.
• Tulleriiaarillutit sulisinnaassasutit, aaqqissuussillaqqissuusutillu.
• Ajornartorsiutaasut misissorsinnaagitit, eqqortunillu aaqqiissutissarsioqataasinnaasutit.
• Immikkoortortaqarfimmi suleqatinik kiisalu Kalaallit Nunaanni Danmarkimilu suleqatigisanik suleqateqarsinnaasutit.
• Namminersorlutit sulisinnaasutit, immikkoortortaqarfimmili suleqatit qaqugukkut siunersiueqatigissanerlugit ilisimaaralugu.
• Aaqqissuussaanermi politikkikkut aqutami sulisinnaasutit.

Inuiaqatigiit kalaallit, oqaasii, kulturiallu ilisimasaqarfigigukkit iluassaqaaq, piumasaqaataanngilarli.

Aaqqissuussaanermi politikkikkut aqutami sulinermik misilittagaqarsimanissaq piumasaqaataavoq. Kalaallit Nunaanni inuiaqatigiinnut soqutiginnissasutit, Namminersorlutik Oqartussanilu sulinermik ilisimasaqarnerulernissannik soqutiginnissasutit naatsorsuutigaarput.

Namminersorlutik Oqartussat ingerlatseqatigiiffiutai kiisalu kiffartuussinissamik isumaqaitgiissutit ilisimasaqarfigigukkit iluaqutaassaaq.

Siuliani allassimasut saniatigut naatsorsuutigaarput ileqqorissaartuusutit, pingaartorsiortuunngitsutit, sulinerullu nalaani nuannisaqataasinnaassasutit.

Uagut pilluta
Attaveqaasersuutinut immikkoortortaqarfimmi sulisut, allaffinnut marluusunut agguataagaallutik aqqaniliupput. Silaannakkut angallannerup, mittarfiit, imarsiornerup, umiarsualiviit, angallannerup, allakkat nalunaarasuartaatitigullu attaveqaatit iluini pilersaarusiornerit, ataqatigiissaarinerit, suliassallu assigiinngitsut immikkoortortaqarfimmi suliarineqartarput. Naalakkersuisoqarfimmi sulinitsigut politikerit aalajangiinissaanni tunngaviusariaqartut qulakkeertussaavagut, soorluttaaq politikerit kissaataasa piviusunngortinneqarnissaat qulakkiigassarigipput.

Suliat qaffasissumik qaffasissuseqarlutik, tulluusimaarutigisinnaasatsinnillu angusaqarfiulluartarluni sulinerup nuannersua, akisussaaffiillu ingiaqatigiissillugit sulineq ulapaarfiuvoq. Ulluinnarni ulapaarfiukkajuttartumi sulisut qiimasuupput. Suliffeqarfiuvugut inissaqartitsilluartoq, suleqatigiit ataatsimoorluartuuvugut,  aammalu sulinerup ilaqutariittullu inuunerup ataqatigiinnissaannut ataqqinnittuulluta.

Pinerluuteqarsimannginnermut uppernarsaat
Atorfimmi atorfinissinnaassaguit malittarisassat naapertorlugit pinerluuteqarsimannginnermut uppernarsaateqartariaqarputit, pinerluuteqarsimannginnermullu uppernarsaat atorfeqarnerit tamaat atatiinnarneqarsinnaasariaqarluni. Taamaattumik pinerluuteqarsimasunik nalunaarsuiffimmit pinerluuteqarsimannginnermut uppernarsaammik aallaqqaammut tunniussissaatit. Taanna najukkami politeeqarfimmi imaluunniit www.politi.gl/bestil-straffeattest/privat-straffeattest-imi pissarsiarineqarsinnaavoq.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
E-mail-ikkut qinnuteqaatinik tigusineq ajorpugut.