Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik
nutaamik suleqatissarsiorpoq, naalakkersuisoqarfik tamaat akimorlugu nutserisussamik pitsaassutsimillu qulakkeerinninnissamik suleqataasussamik.  

Naalakkersuisoqarfik 45-t missaannik sulisoqarpoq, immikkoortortat sisamanut agguarneqarput Sullissinermut, Aningaasaqarnermut Sulisoqarnermut kiisalu Silap Pissusiaq pillugu Immikkoortortaqarfik, Pinngortitamut Immikkoortortaqarfik, Avatangiisinut Immikkoortortaqarfik, Nukissiuutinut Immikkoortortaqarfik aamma Aatsitassanik suliassaqarfinnut Avatangiisinut Aqutsisoqarfik. Aammattaaq Pinngortitaleriffik, Nukissiorfiit,  Innaallagissiornermut oqartussat aamma Asiaq naalakkersuisoqarfiup ataanni inissisimapput.


Ineriartorneq kiisalu naalakkersuisoqarfiup aaqqissuussaanikkut- sulisullu ineriartornissaat ukkataraarput. Ulluinnarni ataatsimoorussamik naleqartitanut toqqammaveqarluta sulisarpugut:

• Qaffasissumik sulianik ilisimasaqassuseq
• Suleqatigiinneq
• Ilakkuminartuuneq sullisserusussuseqarnerlu  

Ulloq sulilerfissaq: 17. juli 2026 isumaqatigiissuteqarnikkulluunniit.  

Suliassatit
Sullissinermut, Aningaasaqarnermut Sulisoqarnermullu immikkoortortaqarfianiissaatit kisianni naalakkersuisoqarfiup sulisuinit tamanit suleqatitut qujarunneqassaatit. Nutsereqataasassaatit allaatigisallu pitsaassusissaannik qulakkeerinnittassallutit, taamaattumillu aqutsisut qanimut suleqatigissavatit aammalu immikkoortortani allani suleqatitit suleqatigisassavatit. Naalakkersuisoqarfiup suliaanik paasitinneqalertussaatit, politikkikkut suleriiatsinik kiisalu qanimut politikkikkut ingerlatsinermut. Kalaallisuumiit danskisut nutserillaqqiittuusaatit, allaatigisallu oqaasertai paasiuminartumik – oqaatsit marluk atorlugit nutserisassallutit.

Suliassatit qitiusut ukuusinnaapput:

• Nutsikkat pitsaassusaannik qulakkeerinninneq
• Danskisuumiit kalaallisut nutserineq paarlattuanillu  

• Naalakkersuisumut, Naalakkersuisunut  Inatsisartunullu pillugit suliassanik nutserineq
• Inatsisissatut siunnersuutinik nutserineq, nalunaarusianik annertuunik allakkanillu nutserineq
• Sullissinermut, Aningaasaqarnermut Sulisoqarnermullu immikkoortortami suliassat allat

 
Piginnaasassat
Taamatuttaaq naatsorsuutigaarput, illit:

• Nutserisutut ilinniarsimasuunissat imaluunniit suliap pitsaassusaanik qulakkeerinninnissamut misilittagaqartuunissat
• Ullormut suliassanik assigiinngiiaartunik ulapaarfiusumi sulilluarnissat/ingerlalluarnissat
• Suleqatikkuminartuunissat
• Aaqqissuulluakkamik piffissaliunneqarsimasunillu eqquutitsinissamut qulakkeerinnissinnaaneq
• Namminerisamik sulisinnaaneq pilertortumillu allassinnaanissaq
• Inunnik assigiinngitsorpassuarnik suleqateqarsinnaaneq
• Qiimasuuneq suleqatinillu pitsaasunik peqateqarluni sulilluarsinnaaneq

Paasisaqarnerorusuppit?
Atorfimmut tunngasumik paasissutissanik amerlanerusunik paasiniaasoqarsinnaavoq, immikkoortortami pisortamut Paninnguaq Kristiansen-imut saaffiginninnikkut, oqarasuaat. +299 345416, e-mail: pcni@nanoq.gl.

Qinnuteqarfissamut killigititaq
Qinnuteqaat CV ilanngullugu, soraarummeernermullu uppernarsaatit assilineqarneri ilanngullugit ataani attavissatut allassimasumut nassiunneqassapput kingusinnerpaamik  ulloq 17-07-2026.
e-mail aqqutigalugu qinnuteqaatit tiguneq ajorpagut.
 

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.