Inuusuttunik inersimasunillu ikiuineq uummateqarfigaajuk? Kalaallit pingaarutilimmik ilinniarnerminnik naammassinninnissaannut tunngatillugu ikiuinissamut pisariaqartippatsigit! Martsip aallaqqaataaniit imaluunniit sapinngisamik piaartumik Nuummi Qinngornerup immikkoortortaqarfiani tarnip pissusaanik immikkut ilisimasalimmik tarnikkulluunniit katsorsaasumik pissarsiorpugut. Ilinniartunik katsorsaalluni oqaloqateqarneq aamma ilinniakkamik naammassinnittartut amerlanerulersinniarlugit kiisalu ilinniartut atugarissaarnerunissaat anguniarlugit suliniutit suliassarissavatit.

Qinngorneq pillugu
Qinngorneq pisortanit ingerlanneqarpoq aamma ilinniartunut neqeroorutaavoq, 2014-imiillu pilersinneqarsimalluni. Ulloq 1. oktobari Inulerivimmut - Nuna tamakkerlugu Katsorsaavimmut Siunnersuisarfimmullu atalerpugut. Tassa imaappoq ilisimasanik avitseqatigiinneq, ataqatigiinneq suleqatigiinnerlu qitiutillugit suliamik ilisimasallit katsorsaaneq pillugu suleqatigiipput.

Immikkoortortaqarfinni tallimaasuni sulisut 12-iuvugut, Ilulissani, Aasianni, Sisimiuni, Nuummi Qaqortumilu agguarsimalluta, taakkunani sulisut tamarmik tarnip pissusiinik immikkut ilisimasallit pisortaat qullersarivaat.

Neqeroorutigaavut:

• Suliffeqarfik Kalaallit Nunaanni ilinniartunut annertuumik allanngueqataanissamik periarfissaqarfiusoq
• Suliffeqarfik soqutiginartoq ulapaarfiusorlu assigiinngitsorpassuarnik suliaqarnissamut periarfissaqarfiusoq
• Suliffimmi avatangiisit pitsaasuunissaannik sulisullu atugarissaarnissaannik pingaartitsiffiusoq
• Siunersiueqatigiinneq, imaarsaaneq pikkorissarnerlu aqqutigalugit suliatigut ineriartornissamut periarfissaqarluartoq
• Pingaarnertut siunertatsinnut iluaqutaasunik suliniutinik aallartitsinikkut atorfinnik ilusilersuinissannut periarfissaqarputit
• Suleqatigiit pikkorissut tunniusimasullu ataqatigiilluartut

Illit ujarpatsigit…

• Tarnikkut katsorsaasutut imaluunniit tarnip pissusaanik immikkut ilisimasalittut ilinniarsimasoq
• Qallunaatut kalaallisullu oqalussinnaasoq
• Inuusuttunik inersimasunillu ikiuinissamik nuannarisalik
• Suliassaqarfiit akimorlugit suleqatigiinnissamut kajumittoq piginnaasalillu
• Inuit akornanniinermik nuannarisalik inunnullu attaveqarnissamut pikkoriffilik
• Onlinekkut katsorsaanissamik neqeroorsinnaanerup pingaaruteqassusianik paasinnittoq
• Kalaallit Nunaat aamma kalaallit piorsarsimassusiat pillugit ilisimasalik

Suliassat
Qinngornermi tarnikkut katsorsaasutut/tarnip pissusaanik immikkut ilisimasalittut ilinniartunik ataasiakkaanik katsorsaalluni oqaloqateqarnissaq pingaarnertut suliassarissavat, aammali eqimattanik oqaloqatiginnittussanik aallartitsinissaq periarfissaassaaq. Tamatuma saniatigut ilinniakkanik naammassinninnissamik ilinniartullu atugarissaarnerulernissaannik siuarsaanissaq pillugu pingaarnertut anguniagaqarnitsinnut tapersersuisunik suliniutikkut aallartitsinikkut ineriartortitsinikkullu atorfimmik ilusilersuinissamut periarfissaqarpoq.
Neqeroorutitta ineriartortinnissaat qitiutittuarparput. Taamaammat suliniutinik aallartitsinissamut atatillugu nutaaliornissamut nutaamillu eqqarsarnissamut kajumissuseqarnissat pingaartipparput. Tassunga atatillugu najukkami suleqatigisartakkavut akulikitsumik ataatsimeeqatigisarpavut.

Tamatuma saniatigut sulinermut atatillugu angalasarnissaq periarfissaavoq, tassani Qinngorneq sinnerlugu suleqatigisartakkat ilinniartullu oqaloqatigisinnaavatit. Sullitatta amerlanerpaartaat najukkami immikkoortortaqarfimmut oqaloqatiginnikkiartortarput, aamma ilinniartunik najukami immikkoortortarfeqanngitsuni najugallit onlinekkut oqaloqatiginissaannut neqeroortarpugut.

Sulinermi atukkat suliamullu pikkorissuseq
Suliffeqarfiuvugut ataatsimoornissamik atugarissaarnissamillu pingaartitsisut. Taamaammat sulisutta nukissaarutinnginnissaannut illersorniarlugit aamma tarnikkut katsorsaanerup qaffasinnerpaajuarnissaa qulakkeerniarlugu katsorsaanermut erseqqissumik najoqqutassanik ineriartortitsinikuuvugut. Tassa ilaatigut imaappoq taamaallaat 20-nik sullitaqartoqassaaq, aamma ullormut tarnikkut katsorsarneqartut pingasunit amerlanerunissaat naatsorsuutigineqanngilaq. Tamatuma saniatigut sulinerup nalaani soorunami ilinniarnissamut imaarsartinnissamullu piffissaliisarpugut.

Suleqatigiinnitsinni nuannersumi ataatsimuussusermik misigineq attattuarniarlugu suliffiup iluani ilisimasanik avitseqatigiittarnissaq, suliffiup iluani imaarsarnissaq, bogklubbi atugarissaarnissarlu anguniarlugit aalajangersimasumik ataatsimiittarpugut. Tamatuma saniatigut suleqatigiit tamarmik Kalaallit Nunaanni sumiiffinni assigiinngitsuni katersuuttarput, tassani suliffeqarfimmik ineriartortitsinissaq sulissutigisarparput ataatsimoorlutalu suleqatigiittut angalasarluta. Taamatuttaaq ukiumut ataasiarluta immikkoortortaqarfiit tamarmik suleqatigiittut angalasarput.

Sullitatta tamatigut pitsaanerpaamik katsorsarnissaat qulakkeerniarlugu atorfillit tamarmik ataasiakkaatut avataaniit imaarsarneqarnissaminnut namminerlu aalajangikkatik malillugit ilinniaqqinnissaminnut periarfissaqarluarput.

Paasissutissat
Atorfiup suussusaa: Inulerivik, Nuna tamakkerlugu Katsorsaavimmi Siunnersuisarfimmilu nutaami ilinniartunut tamanut katsorsaanissamik neqerooruteqartartoq, Qinngornermut katsorsaasussarsiorpoq.

Suliffeqarfik: Inulerivik

Qinnuteqarnissamut killigititaq: 23 februar 2026 nal. 12:00

Attavissat: Sara Lennert, mail: sart@nanoq.gl, tlf.: +299 524770 imaluunniit Caroline Lund, mail: calu@nanoq.gl, tlf: +299 530110