Kalaallit Nunaata siunissammi digitalinngornerunissaannut ilusilersueqataarusuppit aammalu paasissutissanut digitalinngortitsinermullu tunngatillugu piginnaasatit pitsanngorsarusullugit? Taava Tunngaviusumik paasissutissanik suliaqarnermi ilinniartutut ikiortitut pisariaqartippatsigit.

Tunngaviusumik paasissutissanut programmimi ilinniartutut ikiortimik tunniusimasumik ujartuivugut, taassuma paasissutissat katersat aaqqissuullugillu ataqatigiissassavai kiisalu Kalaallit Nunaanni Tunngaviusumik paasissutissat pillugit misissuinermik suliaqassalluni. Suliniummi peqataanikkut Kalaallit Nunaata digitalinngorsarneranut qitiusumik suleqataassaatit aammalu aaqqiissutinik innuttaasunut pisortaqarfinnullu iluaqutaasussanik pilersitseqataassallutit.

Atorfik sapaatip-akunneranut 15-20 akunnernik suliffiussaaq, suleqatit suliaqartullu pikkorissut peqatigalugit teoriit pissutsinut piviusunut atassusissavatit.

Suliassatit
Naatsorsuutigisagut malillugit suliassatit ukununnga attuumassuteqassapput:

• Paasissutissat misissuinerlu

• Paasissutissanik katersinermut inerisaaneq ingerlatsinerlu
• Paasissutissat pitsaassusaannik misissuineq paasissutissanillu katerseriaatsimut pitsanngorsaatissanik suliaqarneq

 

• Ataqatigiissaarineq pilersaarusiornerlu

• Paasissutissanik katersinissamut pilersaarusiorneq aaqqissuussinerlu
• Soqutigisallit assigiinngitsut akornanni sulianik ataqatigiissaarineq
• Workshopinik, ataatsimiinnernik, ataatsimeersuarnernik webinarinillu ingerlatsinermut ikiuunneq

 

• Attaveqaqatigiinneq soqutigisalinnullu suliaqarneq

• Atuisunik peqataatitsinerup qulakkeerneqarnissaa aammalu paasissutissat pitsaassusaat ineriartortinneqarnissaallu pillugit oqaloqatiginninneq
• Paasissutissanik katersineq paasissutissallu pillugit attaveqaqatigiinnerup pitsaassusaata qulakkeernissaa
• Suliniummi suliaqartut soqutigisalinnik suliaqarnerinik ikiortaaneq

Sooq qinnuteqassavit?
Pisortaqarfiit, suliffeqarfiit sulisullu assigiinngitsut akimorlugit aallussillutit sulisuusut inuiaqatigiinni allannguineranni ikiuutissaatit. Taakkua saniatigut:

• Inuiaqatigiit digitalimik ineriartortinneqarnerannut ikiuutissaatit
• Pisortaqarfiit namminersortullu iluanni soqutigisallit assigiinngitsut qanimut suleqatigissavatit
• Paasissutissat, misissuineq pisortaqarfinnilu allaffissornerup iluani piginnaasatit suliarisinnaasatillu inerisassavatit
• Pissutsinit piviusunit misilittagaqalissaatit suliarisartakkannullu sunneeqataasinnaallutit
• Suleqatigiinni nuannaartuni, pikkorissuni ineriartornermillu aallutaqartuni suleqataalissaatit

Ilinniartuunerit paasisinnaalluarparput, piffissarlu uagutsinni atorsinnaasat eqqarsaatigalugu eqaatsumik isiginnilluta.

Illit pillutit

• Aaqqiissuussaasumik suleriuseqarputit suarsuillu isiginiarsinnaallugit
• Digitalimik ineriartornermut digitalinngoriartornermullu iliuuseqarsinnaavutit soqutiginnillutillu
• Paasissutissat pikkoriffigaatit misissorsinnaallugillu
• Suleqatigiinneq aallaavigalugu sulisinnaavutit aammalu soqutigisallit assigiinngitsut akornanni ersarissumik attaveqarsinnaallutit
• Sulianik suliaqariaatsinni nutaaliorsinnaavutit aammalu aaqqiissutissanut pitsaasunik siunnersuuteqarsinnaallutit
• Namminersorlutit sulisinnaavutit ullunilu ulapaarfiusuni ukkataqarsinnaassuseqarlutit
• Eqaatsumik suleriuseqarputit aammalu sinaakkutini suliassanilu assigiinngisitaartuni nalimmassarsinnaassuseqarlutit
• Qarasaasiaqarnermi atortut paasisinnaalluarpatit piginnaasaqarluarlutillu

Piginnaasatit
Ingerlaqqiffiusumik ilinniarfimmik naleqquttumik ingerlataqarputit, ass. misissuinermut aaqqissuussinermullu attuumassusillit soorlu inuiaqatigiilerineq, allaffissorneq, qarasaasiaqarneq assigisaalluunniit.

• Ilinniarnerit imaluunniit ilinniartutut ikiortitut sulinerit aallaavigalugu paasissutissanik misissuineq misilinnikuuat
• Digitalinngortitsinermut soqutigisaqarputit nutaanillu ilikkagaqarusullutit
• Kalaallisut, qallunaatut tuluttullu oqalussinnaallutillu allassinnaavutit
   

Tunngaviusumik paasissutissat pillugit
Digitalinngortitsinermut Aqutsisoqarfimmi suliniutinut immikkoortortaqarfimmi suleqataassaatit, tassanilu aalajangersimasumik tunngaviusumik paasissutissanik suliaqassaatit. Tunngaviusumik paasissutissanik suliaqarnerup siunertaraa Kalaallit Nunaanni paasissutissanik tunngaviusumik suliaqarnermi ingerlatsisoqarnissaa aaqqiissutinillu ineriartortitsisoqarnissaa. Suliniut nuna tamakkerlugu digitalinngortitsinermut periusissiamut ilaavoq, taannalu aqqutigalugu kommunit namminersorlutillu oqartussat digitalimik aaqqiissutinik ineriartortitsisinnaanerat ikorfartorniarneqarpoq.

Tunngaviusumik paasissutissat pillugit suliaqarneq tunngaviusumillu paasissutissat pillugit uani paasisaqarnerusinnaavutit: https://digitalimik.gl/emner/digitale_losninger/grunddata?sc_lang=da

Uagut pilluta
Suliffik suliniutinut immikkoortortaqarfimmiippoq, tassanilu nuna tamakkerlugu digitalinngortitsinermut periusissiap iluani suliniutaasut pisortaqarfinni sulisut allat suleqatigalugit ingerlanneqarlutillu ineriartortinneqartaput.

Immikkoortortaqarfimmi suliniutinik aqutsineq ingerlanneqartarpoq aammalu suliffeqarfiup iluani pisortaqarfinnilu suliniutinik suleriaaseq pitsanngorsaaffigineqartarluni. Suliniutinut immikkoortortaqarfik Digitalinngortitsinermut Aqutsisoqarfiup iluaniippoq.
Digitalinngortitsinermut Aqutsisoqarfimmi Kalaallit Nunaanni inuiaqatigiit iluanni digitalimik aaqqissuussat assigiissakkat qulakkeerneqarnissaat sulissutigineqartarpoq.
Digitalinngortitsinermut Aqutsisoqarfimmi Kalaallit Nunaata digitalinngortinniarneqarnissaa, Kalaallit Nunaanni Qitiusumik Allattoqarfiup qarasaasiaqarnikkut ingerlanneqarnissaa aammalu nittartakkatigut paasissutissanilu isumannaallisaaneq sulissutigineqartarpoq. Aqutsisoqarfimmi akisussaaffiit imartupput, soorlu aamma pisortaqarfiup naapertuuttumik suliaqarnissaa soqutigineqarlunilu naatsorsuutigineqartoq.
Kalaallit Nunaanni nittartakkatigut paasissutissatigullu isumannaallisaanermik pingaarnertut suliaqartuunerput tulluusimaarutigeqaarput, suliarlu taanna maniguulluta suliaralutigu. Taamatut ingerlatsinissatsinnut piginnaasatigut inuttullu pisinnaasatigut piumasaqaatitaqarpoq, tamannalu peqqutaalluni ulluinnagut ulapaarfiullutillu allanngorartuupput. Taamaattumik suleqatigiinneq, ataqqeqatigiinneq kiisalu piginnaasatigut inuttullu assigiinngissuseq aallaavigalugu sulisut ilorrisimaarnissaat anguniagaraarput kiisalu suliagut pitsaasumik naammassineqarnissaat anguniartarlutigu.

Aqutsisoqarfik nunalu tamakkerlugu digitalinngortitsinermut periusissiaq digitalimik.gl iserfigalugu paasisaqarfiginerusinnaavatit.

 
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.